تجربتي مع استلام ارباح جوجل ادسنس وكيف حصلت على ارباحي

  تجربتي مع استلام ارباح جوجل ادسنس وكيف حصلت على ارباحي

بسم الله الرحمن الرحيم , عندك موقع او قناه علي اليوتيوب انضميت مؤخرا لخدمة جوجل ادسنس من شركة جوجل للاعلانات , قاربت علي الوصول للحد الادني لاستلام الارباح بس مش فاكر ايه الخطوه القادمه , ان شاء الله في تجربتنا اليوم هوضح ليك خطوات استلام ارباحك من جوجل ادسنس من خلال ويسترن يونيون.

تجربتي مع استلام ارباح جوجل ادسنس من ويسترن يونيون

– في البداية ان شاء الله هيبقي ليا تجربه قريبا عن جوجل ادسنس بتفسير و توضيح للموضوع بكامل تفاصيله و ستكون تجربه مفيده ان شاء الله لاصحاب المواقع و قنوات اليوتيوب .

كيفية استلام الارباح من جوجل ادسنس

- اولا لازم تبقي عارف بعض الامور الاساسيه :
– الحد الادني لاستلام الارباح من جوجل ادسنس 100 دولار او 70 يورو .
– يجب ان حسابك يكون مفعل بالبن كود سواء وصلك جواب البن كود او ارسلت صورة البطاقة و تم تفعيله .
– انت بتستلم ارباحك الشهر ده عن ارباح الشهر الماضي , هتقولي ازاي , احنا دلوقتي في شهر مارس موقعك شغال و بيدخلك ربح كل يوم , في اخر يوم في شهر مارس مع دخول اول يوم في شهر ابريل ارباحك بيتم ارسالها للدفعات لكي تستلمها , يعني ارباحك الي جمعتها كلها في شهر مارس هتستلمها في نهاية شهر ابريل .
طيب لو انت موصلتش للحدي الادني الي هو 100 دولار او 70 يورو مع نهاية شهر مارس يبقي هتنتظر لحد اما توصل للحد الادني في شهر ابريل و هتستلم دفعتك في نهاية شهر مايو . يعني لازم تصل للحد الادني للدفعه مع اخر يوم في الشهر لكي تستلم الارباح في الشهر الي بعده .
– امتي شركة جوجل ادسنس بترسل الارباح ؟
سؤال مهم جدا , جوجل ذكرت بشكل واضح جدا ان الارباح بيتم ارسالها في غضون 30 يوم بعد انتهاء الشهر الي تخطيت فيه الحد الادني , بمعني جوجل بتقول ببعت الفلوس ممكن يوم 31 في الشهر .
ثانيا مفيش وقت محدد لارسال الدفعات يعني كان في شهر جوجل اصدرت فيه الدفعه يوم 20 في شهر اخر يوم 27 , فهو مش ثابته , ومع ذلك للاسف الشديد بنلاقي في مواضيع متابعة الدفعات في المنتديات العربيه رعب و قلق و حاله غريبه مع انك تجد ان لسا يوم 23-24 في الشهر ! .
– فانت بتنتظر من يوم 20 تبدأ تراجع حسابك تشوف ظهرت عبارة ( جاري الدفع ) ام لا , وظهور كلمة جاري الدفع اي دفعتك بيتم اعدادها لارسالها ليك , بعد 24 – 48 ساعه او علي حسب جوجل بتظهر عبارة ( الحالة : تم اصدارها ) و ده معناه ان ارباحك تم ارسالها بالفعل و ممكن تستلمها من الان .
– طيب ازاي ادخل علي المكان الي بيظهر فيه الكلام ده من حساب ادسنس :
بتدخل علي رئيسية حساب ادسنس من ناحية اليمين لو عربي بتختار الدفعات – سجل الدفعات

هتضغط علي جملة الحالة تم اصدارها , هيفتح ليك صفحه الدفعه الي بيبقي مذكور فيها العشرة ارقام رقم الحواله المهمه جدا .

هتكتب في ورقة رقم الحواله الي هو العشرة ارقام الي هو MTCN .
بعد كده هتشوف اقرب فرع لويسترن يونيون ليك , هتقولي طيب انا هعرف ازاي اقرب فرع لويسترن يونيون ليا , اولا هتكلم رقم خدمة عملاء ويسترن يونيون 19190 و هتسأل علي اقرب فرع ليك , او تدخل علي موقع ويسترن يونيون و تشوف علي الماب اقرب فرع ليك او اذهب لاي فرق لبنك الافريقي او اسكندريه بنسبة كبيره هتلاقي فيهم ويسترن يونيون .
– هتروح فرع ويسترن يونيون , هتدخل و تخد ورقة صفراء صغيره زي الي في الصوره القادمه , هتكتب فيها كالتالي :
– رقم التحويل : هتكتب العشرة ارقام بتوع الحواله الي هو MTCN .
- اسم الراسل : جوجل او google .
– عنوان المستلم : هتكتب عنوانك .
– البلد المرسل منه : ايرلندا .
– المبلغ : هتكسب ارباحك الدفعه الخاصه بيك .
– رقم تليفون المستلم : هتكتب رقم تليفونك الشخصي .
وتروح لاي شباك فاضي بتدي الورقه للموظف مع بطاقتك , وبيدخل الموظف علي الشبكه بيشيك علي الحواله بالرقم و اسمك و بيسلمك ايصال تمضي عليه اسمك و بيسلمك صوره منه و بيديك فلوسك طبعا بالدولار فقط و انتي بتحولها من اي مكتب صرافه بره الي الجنيه المصري و انتهي علي كده .
معلومة الكسر عند الاستلام في ادسنس , لو الكسر اقل من 60 سنت مش بتستلمه اما لو اعلي من 60 سنت بتستلم 1 دولار صحيح .


وفي الختام نتمني ان تكون تجربتنا اليوم قد نالت علي رضاكم مع الوعد بالمزيد من التجارب الهادفة و المميزة , واذا كان لديك اي افكار بخصوص تجربتنا اليوم مع استلام الارباح من جوجل ادسنس  نسعد بطرحك لها في تعليق , او اذا كان لديك استفسار نسعد بالاجابة عليه .